«Жыр алыбы Жамбыл» айтысы
«Жыр алыбы Жамбыл» айтысы
Қаңтар айының 21 жұлдызында Қалбатау ауылындағы Георгиевка орта мектебінде айтыстың аудандық кезеңі өтті. Бұл ақындық додаға мектебімізден қазақ тілі мен әдебиеті пәндерінің мұғалімі Айкенова Мадина Амангельдыевнаның жетекшілігімен 9 «Ә» сыныбының 2 оқушысы Ажимбетова Нұргүл мен Төлеуғазы Айдын қатысты. Синкреттік өнердің бұл аса күрделі түрінде бірінші рет қатысып оқушыларымыз жақсы өнер көрсетіп, доданы бағалаушы әділқазылардың оң бағасына ие болды. Бұрын-сонды волейболдан аудандық жарыстарға қатысып, ала доптың шебері, үздік ойыншы атанып жүрген Айдын осы жолғы жаңа ізденіс, жаңа белеске батырлықпен қатысып, өжеттілігімен, тапқырлығымен көрермендерді тәнті қылды. Ал ақындығымен бұрыннан танылып жүрген ақын қызымыз Нұргүл осы жолы тасы өрге жүзіп, жүлделі ІІ орынмен марапатталып, айтыс ережесіне сәйкес облыстық додаға жолдама алды. 31 қаңтар күні Өскемен қаласында қасиетті қара шаңырағымыздың абыройын қорғайтын болады. Н.Ажимбетова Абай атамыздың 175-жылдығы мен Жамбылдай жүз жасаған жыр дүлдүлі туралы ойдан жыр шығарып, суырып салма ақындығын көрсете білді. Осы бағыттан таймай, болашақта одан да биік шыңнан көрінеді деп сенеміз. Айдынға мойымай, ақындығын, бойындағы тума талантын дамытсын деп тілеп, Нұргүлдей мектебіміздің жақұтына алдағы додадан сәттілік тілей келе, мол үмітімізді артамыз!
